LAOAG CITY – Inpakaammo ni Dr. Bryan Realgo, ti Adviser ti Young Communicators’ Circle ti Mariano Marcos State University a manarimaan a maisaysayangkat ti Y2C Cinema iti nasao nga unibersidad.
Segun kenkuana, daytoy a proyekto ket kas paset ti pannakaselebrar ti National Arts Month ita a bulan ti Pebrero no sadino dagiti estudiante ti 1st year agingga 4th year ti Bachelor of Arts in Communication ket nagaramid ti bukudda a pelikula.
Inbatadna a nangpartuat dagiti maseknan nga agad-adal ti uppat a documentary ken uppat a narrative tapno maipakita ti kinalaing iti productions skills dagitoy iti panagaramid ti pelikula.
Kunana a daytoy ti maikatlo a tawen a maisaysayangkat ti nasao a programa a nangrugi daytoy idi tawen 2021 babaen iti online ngem itan ti maikaduan a tawen nga in-person.
Inlawlawagna a ti napilida ti agaramid ti pelikula gapu ta maysa daytoy nga arts a pakakitaan ditoy dagiti visuals, sounds ken movements.
Inpakaammona nga iti sumarsaruno a tawen ket planoda nga luktan daytoy a programa para kadagiti nagduduma a kolehio pakairamanan dagiti filmmakers.
Innayonna a manarimaan ti proseso ti posibilibidad a pannakaipabuya dagiti naaramid a pelikula dagiti estudiante babaen iti online.
