LAOAG CITY – Nadismaya ni Presidente Ferdinand Marcos Jr. kalpasan a naamoan na nga addan idiay France ti pugante a ni dai nga Ako Bicol Partylist Rep. Zaldy Co manipod iti Czech Republic.
Iti press briefing iti Malakanyang, inbatad ni Palace Press Officer Usec. Claire Castro nga inreport ti Department of Foreign Affaris (DFA) iti presidente a nakaawat ti departamento ti ‘highly reliable information’ a ni Zaldy Co ket addaan ti pending petition para iti political asylum idiay France.
Immuna iti daytoy, inpakaammo ni Castro a naawaten ti Malakanyang ti kompleto a report manipod ken ni Justice Secretary Frederick Vida ken Foreign Affairs (DFA) Secretary Teresa Lazaro mainaig iti sitwasyon ti pugante na ni Zaldy Co.
Kuna na a basar iti high level engagement da Vida ken Lazaro kadagiti opisyal ti Czech Republic ken dagiti mangibagi ti European Union, nalawag a dagiti addang nga ar-aramiden ket naka-angka iti panangrespetar kadagiti maipatpatungpal a linteg ti European Union ken dagiti member states na.
Ni Co ket wanted iti Pilipinas gapu kadagiti kaso a korapsyon ken malversation of public funds mainaig iti maipagarop a pannakairaman na iti ghost flood control project.
