LAOAG CITY – Inakusaran ni dati nga Ako Bicol Party list Representative Zaldy Co ni dati nga House Speaker Martin Romualdez a nangpangta ti sarita nga “he will shoot him” no bilang agsarita isuna ken agsubli ditoy Pilipinas.
Iti maikatlo a paset ti video statement nga inruar ni Co, nangrugi ti panangpangta kenkuana idi Marso 2025 iti maysa a taripnong.
Kunana a tinawagan isuna ni Romualdez a saanen nga agsubli ditoy pagilian ken protektaranda daytoy.
Inlawlawagna a naminsan manen a timmawag kenkuana ni Romualdez ken binagaanna isuna a no agawid ditoy pagilian ket agbalin a narisgo.
Inpettengna a mabalin nga ag-hire isuda ti maysa a tao tapno i-kidnap wenno ag-hire ti pulis tapno papatayen isuna kabayatan nga adda iti pagbaludan.
Immunan nga inrakurak ni Co a nakaplano daytoyen nga agawid ditoy Pilipinas kalpasan ti State of the Nation Address (SONA) ni Presidente Ferdinand Marcos Jr. ngem apaman ti panagawidna ditoy pagilian ket tinawagan isuna ni Romualdez ken nabagaan a saan nga agsubli ditoy pagilian ken protektaran isuna kas ti pammilin ti Presidente isut gapuna a nagulimek daytoy.
Nupay kasta, kuna ni Co a ti kayatna a saoen daytoy ket usarenda laeng isuna a mangkalub para iti kampania ti administrasion kontra iti korapsion.
