LAOAG CITY – Nangiruar ti maikapat a video ni dati a Congressman Elizaldy Co iti Facebook page-na no sadinno nga inbatadna a plano ti administrasion a paruaren isuna kas terorista tapno maitabon kaduana ti kinapudno mainaig iti nakaro a korapsion.
Kuna ni Co, manipud idi 2022 agingga iti 2025 ket dumanon iti ₱56 billion ti naikabil a kickback para ken ni Presidente Ferdinand Marcos Jr. ken dati nga House Speaker Martin Romualdez manipud kadagiti flood control projects idiay Bulacan.
Inlawlawagna a malaksid iti daytoy, ti ₱25 billion a kickback ni Marcos ken Romualdez manipud iti ₱100 billion nga inpasingit ti Presidente iti 2025 national budget.
Kunana a ti kickback ket manipud iti ₱97 billion a flood control insertions iti 2026 National Expenditure Program.
Inpettengna a nangrugi ti amin idi nagtugaw isuna kas chairman ti appropriations committee idi 2022 ket binagaan nga insigida isuna ni Romualdez nga ag-deliver iti kada bulan ti ₱2 billion.
Simmaruno iti daytoy ket timmawag pay kenkuana ni dati a Department of Public Works and Highways (DPWH) Undersecretary Roberto Bernardo ken inbagana a tulungan ti problema ti Bulacan iti layos ken napasarunoan daytoy iti panagturongna iti opisina ni dati a Department of Public Works and Highways Bulacan District Engineer Henry Alcantara.
Segun ken ni Co, indatag ni Alcantara ti plano ti panagbingay iti kickback no sadinno a 22 a porsiento ket para ken ni Romualdez, 2 a porsiento ken ni Bernardo ken 1 a porsiento ken ni Alcantara.
Inbatadna a dagiti tauhanna ti makikokoordinar kadagiti tauhan ni Alcantara para iti deliveries ti binilyon a kickback iti pagtaengan ni Romualdez iti North Forbes Park, McKinley Drive ken iti Number 14 Narra St. South Forbes Park.
Inlawlawagna nga idi Nobiembre 2024 ket binagaan isuna ni Undersecretary Jojo Cadiz a makapungpungtot ni Presidente Marcos gapu ta awan ti maaw-awatna a remittance.
Gapu iti daytoy, inpakaammo ni Co, idi Disiembre 2 ket personal a nangipaay isuna ti 200 million ken ni Cadiz para ken ni Marcos ken ₱800 million idi Disiembre 5 a maipagarup nga agpada nga intulod ni Cadiz iti balay ni Marcos iti number 41 Narra Street South Forbes Park.
Innayon ni Co, dinakamat pay kenkuana ni Romualdez nga inbilin ni Marcos ti panaggatang ti maysa a pagtaengan iti number 30 Tamarind Street South Forbes Park nga isu ti maus-usar a bagsakan ken pangikabkabilan kadagiti kuarta manipud iti SOP ken deliveries para iti Presidente.
