LAOAG CITY – Agladladingit ti football association iti Zambia gapu iti ipupusay ti pito a players da manipod iti Chavuma Town Council FC kalpasan a nadisgrasya ti nagluganan da.
Inbatad ni football association (Faz) president Andrew Kamanga a napasamak ti nakaam-ames nga insidente bayat ti panagturong dagiti players iti third-tier league game.
Malaksid kadagiti natay ket adda pay ti 12 a sabsabali dagiti nasugatan iti insidente ken lima kadagitoy ti naiyakar iti ospital iti ciudad ti Lusaka idiay Zambia.
Mainaig iti daytoy, mangnamnama ni Confederation of African Football (Caf) president Patrice Motsepe a makarekobre iti kabiitan a panawen dagiti nasugatan.
Kagiddan iti daytoy, indanun ni Motsepe ti pannakipagladingit ti sibubukel nga asosasyon iti pamilya dagiti biktima.
