LAOAG CITY – Kalikagum ti Zhulin restaurant a maiparaman dagiti nagduduma a Chinese foods kadagiti Pilipino iti nalaka a presio.
Segun ken ni Ms. Jennifer Lumboy, Manager ti Zhulin restaurant, ti kayatna a saoen ti sarita a Zhulin a naipanagan iti restawranda ket bamboo wenno kawayan nga isu ti kankanen dagiti panda a nangrugi idiay China.
Inlawlawagna no apay a napili ditoy siudad ti Laoag a naipasdekan ti restawranda ket gapu ta gagemda nga adda ti maipatakder a Chinese restaurant iti tunggal siudad ditoy probinsia.
Inbatadna a kayatda nga idanon dagiti kultura dagiti Chinese babaen iti panangidiayada kadagiti nagduduma a taraon ti China.
Kunana a dagiti kangrunaan nga ididiaya a Chinese foods ket noodles, siomai ken dadduma pay nga in-inoten a birbiroken ken ay-ayaten dagiti Ilokano.
Innayonna nga iti agdama ket ti kinakurang ti empleado a mangasikaso kadagiti kostumerda ti pannubokda ngem ikarkarigatanda a solbaren daytoy iti mabiit.
