LAOAG CITY – Nagdesisyon dagiti miyembro ti House Committee on Good Government and Public Accountability nga agtitinnulong tapno mangipaay da ti gunguna iti siasinno man a makaitudo ken ni “Mary Grace Piattos” a kadakkelan ti naala iti confidential funds ti Office of the Vice President.
Kinumpirmaran ni Zambales Representative Jay Khonghun a mangipaay da ti maysa a milyon a pisos iti makaipaay ti impormasyon iti kinatao ken lokasyon ni Piattos.
Inbatad ni Khonghun a nupay adda ti dadduma a nagan a mapagduduwaan iti acknowledgement receipts, ni “Mary Grace Piattos” ti arigna addaan ti kadakkelan a naala.
Rimuar ti nagan ni Piattos iti panagdengngeg ti Good Government and Public Accountability no sadinno a maipagarop a maysa daytoy kadagiti signatories ti acknowledgement receipts nga insumitir ti Office of the Vice President iti Commission on Audit mainaig iti confidential funds.
Segun met ken ni La Union Representative Paolo Ortega, maikumpara iti listaan iti sari-sari store dagiti inusar a nagan ti office of the Vice President.
Maladingitan da Khonghun ken Ortega gapu ta saan nga agatendar da Vice President Sara Duterte iti sumaruno a panagdengngeg ti House panel uray personal nga inyawat da ti imbitasyon.
Inrakurak dagiti dua nga agpanpanday linteg a kalikagom da a malpasen ti imbestigasyon ti komite ken maaprubaranen ti committee report isut gapuna a napateg nga agatendar ti resource persons a makailawlawag seknan iti maibagbaga a saan nga usto a pannakausar ti pondo.
