LAOAG CITY – Inbilin ni Presidente Ferdinand “Bongbong” Marcos Jr. ti pannakaiparuk-at ti pakabuklan a P321 milyon a pundo para iti 34 a probinsia ken walo a siudad a naapektaran gapu iti Bagyo Basyang ken ti shear line.
Daytoy a pammilin ket naipatulod ken ni Executive Secretary Ralph G. Recto nga inpasiguradona ti alisto a pannakaiparuk-at ti pinansial a tulong kadagiti naapektaran a lokal a gobierno.
Segun iti Presidente, dagiti naglabas a dakes a panawen ket nangitunda ti naruay a nagibakwit, pannakatay ti saan a bumaba iti 12 nga indibidual basar iti Office of Civil Defense ken nakaro a pannakadadael kadagiti imprastraktura.
Inbatad ni Recto nga usaren ti pundo para iti rehabilitasion kadagiti nadadael nga istraktura ken panangtulong kadagiti residente a napukawan ti pagtaengan.
Daytoy ket paset ti pammilin ti Presidente tapno mapaalisto ti panagbangon dagiti komunidad manipud iti kalamidad.
Karaman kadagiti makaawat ti tulong dagiti probinsia manipud iti Mindanao pakairamanan ti Surigao del Sur, Surigao del Norte, Dinagat Islands, Agusan del Norte, Agusan del Sur, Misamis Oriental, Misamis Occidental, Lanao del Norte, Davao de Oro, Davao del Norte, Bukidnon, Camiguin ken Zamboanga del Norte.
Iti Visayas, Negros Oriental, Negros Occidental, Bohol, Capiz, Aklan, Leyte, Cebu, Iloilo, Eastern Samar, Southern Leyte, Antique, Siquijor, Samar ken Northern Samar.
Iti Luzon, Catanduanes, Camarines Sur, Sorsogon, Masbate, Camarines Norte, Occidental Mindoro ken Oriental Mindoro.
Mainaig iti daytoy, ti walo a siudad ket makaawat ti ayuda kas iti Iligan, Cagayan de Oro, Bacolod, Butuan, Cebu City, Zamboanga City, Iloilo City ken Mandaue City.
Malaksid iti pundo, inbilin pay ni Presidente Marcos ti naiget a river clearing operations ken dagiti addang iti flood mitigation tapno maliklikan ti panaglayus manen iti masangoanan.
Kagiddan daytoy, indauluan ti Presidente ti panangpirma iti maysa a Memorandum of Agreement (MOA) iti nagbaetan ti Department of Education ken dagiti provincial Local Government Units para iti nalawa a classroom building program iti intero a pagilian.
