LAOAG CITY – Nagballaag ni Presidente Ferdinand Marcos Jr. iti kumarkaro a tension iti West Philippine Sea kalpasan a linapdan dagiti kameng ti China ti medical evacuation ti maysa nga agsakit a soldado a Pilipino manipud iti BRP Sierra Madre iti Ayungin Shoal.
Iti maysa a press briefing kalpasan ti working visit ni Presidente Marcos iti Singapore, inpetteng na a makaalarma ti nadakamat nga insidente gapu ta panagagas laeng ti gagem ti humanitarian mission a kinontra ti China.
Inyarig ni Marcos ti situasion kadagiti panawen ti gubat no sadinno mapalubusan nga agdalyasat kadagiti teritorio ti medical team tapno agitulnog ti tulong-medikal, isut gapuna a saan a nainkalintegan ti inaramid a pananglapped dagiti Tsino.
Kabayatanna, binigbig ti Presidente ti kinatured dagiti soldado a Pilipino a nagballigi a nangisayangkat ti medical evacuation iti baet ti pannakaipit da manipod iti China, ken nagtalinaed ti takder da a saan a pulos nga agkiddaw ti pammalubos ti pagilian kadagiti gangannaet tapno aggaraw iti bukodna a teritorio.
