LAOAG CITY – Agtaltalinaed a kuwestionable ti kari ti Estados Unidos iti Pilipinas iti proteksion iti aniaman a pangta iti teritorio.

Dayta ti inbatad ni Mr. Denmark Suede, maysa a Geopolitical Observer mainaig iti panagbisita ni United States President Donald Trump ditoy pagilian ken ti manarimaan a panagbisitana idiay China.

Segun kenkuana, nalaing ti Estados Unidos iti pakasaritaan ti pannakikadwa iti agsinnumbangir a partido, no sadinno agingga a saan pay a natungpal ti karida ket saan pay a maibaga nga adda iti Pilipinas ti full commitment-na.

Inpettengna a maysa kadagiti mabalin nga agbalin a rason a maaramat a taktika ti Pilipinas ken ti mabalin a mapasaran ti pagilian a risgo ket ti lokasion ti Pilipinas nga asideg laeng daytoy iti Taiwan, no sadinno addan dagiti immunan a damag a kalikagum a pagbalinen ti China a teritorioda ti Taiwan.

Kinuana ni Suede a no makapagdesision ti China a sakupen ti Taiwan ket mairaman ti Pilipinas iti anaiaman nga iwayat ti China a panagatake kontra iti Taiwan.

Daytoy ket gapu dagiti presensia dagiti nsurok 200 a ribo a Pilipino nga mangmangged idiay Taiwan.

Malaksid ti dayta, ti kinaadda ti mutual defense treaty ti Pilipinas ken Estados Unidos ket mabalin a mang-trigger iti China a punteryaen ti Pilipinas.