Inbatad ni Mr. Christopher King Medina, mangidadaulo iti Persons with Disability Affairs Office (PDAO) ditoy ciudad ti Laoag a kasapulanen ti birth certificate ken photocopy ti National Identification Card iti panagaplikar wenno panag-renew ti Persons with Disability (PWD) ID ditoy siudad.
Segun kenni Medina, daytoy ket paset ti panangipatungpal iti Unified PWD ID a naggapo iti National Council on Disability Affairs (NCDA), a gagem na a maurnus ken mapapintas ti rekord dagiti rehistrado a Persons with Disability.
Inlawlawag na a saan a maikkat ti pannakaaramat ti daan a PWD ID nga inisyu ti lokal a gobierno, ngem mairaman itan dagiti baro a dokumento a masapul nga isumitir dagiti agaplikar.
Kunana nga iti kallabes ket kasapulan laeng ti certificate of residency, medical certificate, application form ken ladawan, ita a gundaway ket mainayon ti photocopy ti National ID ken birth certificate.
Segun ken Medina, napateg ti birth certificate tapno makita a nalaing no usto dagiti personal nga impormasyon ti aplikante, aglalo ti nagan na, idinto a ti National ID ket mangpaneknek iti pannakarehistro iti sistema ti Philippine Identification System.
Kalikagum ti nasao nga opisina makarehistro amin dagiti Persons with Disability ditoy siudad ti Laoag tapno magundawayan da amin a benepisyo a nairanta a para kadakuada.
