LAOAG CITY – Agturong ni Presidente Ferdinand “Bongbong” Marcos Jr. iti Singapore para iti lima nga aldaw a working visit manipud inton bigat, Oktubre 7 agingga 11.
Gagem ti nadakamat a panagbisita a paunegen ti relasion ti dua a pagilian aglallalo iti ekonomia.
Segun ken ni Foreign Affairs Assistant Secretary Analyn Ratonel a ni mismo Prime Minister ken Minister for Finance Lawrence Wong ti nag-imbitar iti presidente tapno agbisita iti Singapore.
Kunana a napateg daytoy a panagbisita gapu iti dandani a panagleppas ti akem ti Pilipinas kas chair ti Association of Southeast Asian Nations wenno ASEAN ken sumaruno kadaytoy ti Singapore.
Mainaig iti daytoy, ditoy pagilian a maisayangkat ti 2026 ASEAN Summit manipud inton Nobiembre 16-18.
Iti panagbisita ni Presidente Marcos iti Singapore, manamnama nga agatendar daytoy iti 24th Forbes Global CEO Conference no sadinno makaduana ti sumagmamano a kangrunaan a Singaporean ken global business leader no sadinno ditoy ibatad ni Marcos ti investment ken economic priorities para iti panangpadur-as dagiti kangrunaan a sektor.
Kabayatanna, karaman pay iti panagbisita ti Presidente iti Singapore Nuclear Research and Safety Institute.
