LAOAG CITY – Inpakaammo ni Engr. Rommel Batuac, ti Chief Operation iti National Irrigation Administration nga adda laengen 10 a porsiento ti nabatbati a saan pay a nalako a Bagong Bayaning Magsasaka wenno BBM rice.
Segun kenkuana, ti 90 a porsiento ket nalpasen a nabayo ken naibunongen kadagiti maseknan a lokal a gobierno ditoy probinsia.
Inbatadna a kalikagumda a maibunong amin dagitoy agingga inton bulan ti Abril tapno napintas latta ti kalidadna.
Inlawlawagna a ti maysa kadagiti wagas nga ar-aramidenda ket agbayoda laeng no adda ti agpa-iskedyul tapno napinpintas ti kalidadna.
Kunana nga iti agdama ket adda laengen ti nabatbati a 110 a tonelada nga irik wenno 65 a tonelada a bagas.
Mainaig iti daytoy, kuna ni Engr. Batuac nga adda ti bukud a BBM rice ti National Irrigation Administration a mailako kadagiti Kadiwa Store malaksid laeng ti aggapu iti Department of Agriculture.
Nupay kasta, inpettengna nga iti agdama ket maiyur-uray pay laeng ti masurot a guideline para iti pannakaipatungpal ti nasao a programa ti gobierno.
