LAOAG CITY – Natiliw ti lima a barangay tanud, dua a barangay kagawad ken tallo a sabsabali pay iti Barangay 50, Buttong ditoy ciudad ti Laoag gapu iti illegal a panagsusugal partikular iti ay-ayam a dropball.
Nakakumpiskar dagiti otoridad iti lugar dagiti mausar iti panagay-ayam ti dropball ken ti P3,680 a pisos a maipagarop a pusta.
Mainaig iti daytoy, inbatad ni Barangay Chairman Jessie James Bonoan iti nadakamat a barangay a nakigtot idi naamoan na ti pannakatiliw ti dua a barangay kagawad ken lima a barangay tanud da gapu iti maipagarop nga illegal a panagsusugal.
Inkalintegan na nga ar-aramiden da laeng ti trabaho da kas opisyal ti barangay ken tanud ngem nairaman dagitoy a natiliw iti baet a saan a naaktwan dagiti otoridad nga agay-ayam da iti dropball.
Kuna na nga awan pay ti naaktwan dagiti otoridad nga agay-ayam ti dropball iti nadakamat a barangay.
Innayon na nga iti panagsaludsud dagiti barangay kagawad na kadagiti operators ti dropball ken ti running light kas paset ti panagfiesta iti barangay ket inpasingked dagiti maseknan nga adda ti pammalubos kadakuada ti kampo.
Inpalgak pay ti kapitan nga addan ti sumagmamano a lawas sipud agop-operar ti running light ken dropball iti barangay da isut gapuna a masdaaw no apay nga iti maudin nga aldaw a kaadda dagiti maseknan ket isu laeng ti panangiyuswat dagiti otoridad ti operasyon no sadinno nga inramraman da pay dagiti barangay tanud ken barangay kagawad na a tiniliw.
Immun-una iti daytoy, inpakaammo ti kapitan nga inimbitaran dagiti otoridad dagiti maseknan a barangay tanud ken barangay kagawad tapno agpalawag no apay nga in-tolerate da ti panagay-ayam ti dropball iti barangay da ngem maipagarop nga isu metten ti pannakaipila ti reklamo babaen iti inquest kontra kadagitoy.
