LAOAG CITY – Dumanon iti 100 a ribu a mangmangged ti napukawan ti trabaho kalpasan a kinanselar ti lisensia dagiti contractor a karaman iti maanomalya a flood control projects.
Iti deliberasion para iti budget ti Department of Labor and Employment (DOLE) ket kinumpirmaran ni Senador Sherwin Gatchalian nga sponsor ti pundo ti ahensia a 100 a ribu a mangmangged ti naapektaran iti panangpaserra kadagiti kompania dagiti kontratista.
Sinaludsod ni Senador Risa Hontiveros no ania ti addang nga ar-aramiden ti Department of Labor and Employment kadagiti mangmangged a napukawan ti trabaho.
Inbatad ni Gatchalian a nangipaayda ti temporary employment assistance measures, nakikoordinarda pay iti construction industry ken mangipatpatungpal ti reskilling ken upskilling programs.
Kabayatanna, immunan nga inpakita ni Senador Joel Villanueva nga immuli iti 5.3% ti unemployment rate agingga idi Hulio 2025 a kangatoan sipod idi pandemia idinto a 14.8% met ti nagngatoan ti underemployment.
