LAOAG CITY – Nasentensiaan ti 11 nga indibidual iti ipapatay iti babaen ti korte idiay Vietnam gapu iti kaso ti Vietnam drug trafficking.
Pakairamanan dagitoy ti pakabuklan a 227 nga indibidual a naakusaran, nga addaan iti sentensia a pannakaibalud manipud 18 a bulan agingga iti tungpal biag.
Karaman kadagiti nasentensiaan ni Ha Danh Nam a maipagarup nga isu ti mastermind ti drug trafficking network, no sadinno a daytoy ti nangiyurnos iti pannakaiyeg dagiti droga manipud France nga agturong idiay Vietnam.
Nangrugi ti kaso idi Marso 2023 no sadinno nga uppat a flight attendant ti Vietnam Airlines ti simmangpet idiay Ho Chi Minh City manipud Paris a natiliwan nga awit-awitda ti nasurok a 10kg a drugs iti 157 a toothpaste tubes.
Naduktalan nga inlemmeng ni Nam dagiti drugs iti uneg dagiti consumer goods a pakairamanan dagiti dietary supplement, laundry detergent, mouthwash ken kape nga inyurnosna tapno awiten dagiti tattao idiay France dagitoy iti bagaheda wenno maibiahe iti babaen ti delivery service idiay Vietnam.
Pinuntiria ni Nam dagiti Vietnamese nationals nga agnanaed wenno agad-adal idiay France kas drug mules.
Kinuna dagiti piskal a dagiti nairaman iti daytoy a transnational drug trafficking network ket nagusarda kadagiti encrypted messaging platforms ken bank accounts a nairehistro iti nagan ti nagduduma a tattao tapno nalaklaka ti panagreggetda nga agipuslit.
