LAOAG CITY – Posible a mausar ti nasurok 12.9 million pesos a balanse ti gobyerno probinsyal a paggatang para iti COVID-19 vaccines nga agserbi para kadagiti umili malaksid laeng dagiti bakuna nga aggapu iti gobierno national.
Ti nasao a kantidad ket pundo nga immuna a nailatang para kadagiti programa ken proyekto ti probinsia ngem kalpasan ti pannakaibanagna ket adda ti sumagmamano a kantidad a saan a nagastos sipod idi tawen 2017, 2018, 2019 ken uray itay napan a tawen 2020.
Gapu iti daytoy, masapol a dagiti napagtitipon a balanse nga umabot ti nasurok 12.9 million pesos ket balbaliw naiprograma ken gapu ti COVID-19 pandemic, maiyataday a mailatang ken mausar ti nasao a pundo para iti panaggatang ti kasapulan a bakuna.
Kabayatanna, maiyendorsar ti nasao a banag iti Sangguniang Panlalawigan para iti naan-anay a pannakatingiting a naimbag sakbay a maaprobaran daytoy.
