LAOAG CITY – Tinamaan ti drone strike ti Russia ti maysa a bus a nagluganan dagiti minero iti eastern Ukraine.
Nagresulta daytoy iti pannakatay ti 12 a minero nga agawid koman manipod iti trabaho iti eastern Dnipropetrovsk region idinto a 15 pay a sabsabali dagiti naireport a nasugatan iti panagatake.
Sakbay iti daytoy, adda ti innem a nasugatan iti napalabas a lawas kalpasan a tinamaan ti drone strike ti maysa a nalatak a maternity hospital iti Zaporizhzhia.
Immunan nga inbatad ni US President Donald Trump nga immanugot ni Russian President Vladimir Putin nga isardeng ti aerial attacks kadagiti ili ken ciudad karaman iti Kyiv iti baet ti nalamiis a temperature, ngem iti saan a nagbayag ket inrakurak ti Kremlin a nagpatinggan ti katulagan idi domingo.
Kabayatanna, inbatad ni Ukrainian President Volodymyr Zelensky, a naikeddeng a maiyuswat ti maikadwa a bansada ti trilateral talks tapno agpatinggan ti gubat iti nagbaetan ti Russia ken Ukraine intono Miyerkules ken Huwebes imbes nga intono domingo.
Innayon na a naitantan ti dayalogo United Arab Emirates iti nagbaetan dagiti opisyal ti Amerika, Russia ken Ukraine gapu iti agtultuloy a tensiyon iti nagbaetan ti Estados Unidos ken Iran.
