LAOAG CITY – Nadismaya ni Sen. Loren Legarda iti saan a panagatendar ni Department of Energy Secretary Sharon Garin iti umuna a panagdengngeg ti Senate ad hoc committee maipanggep iti plano ti gobyerno iti epekto ti krisis gapu iti mapaspasamak a riribok iti Middle East.
Daytoy ket kalpasan a nangiyuswat ti PROTECT Committee (Proactive Response and Oversight for Timely and Effective Crisis Strategy) ti no sadinno a naobserbaran ti sumagmamano a senador ti panaglangan ti DOE chief iti panagdengngeg.
Immuna iti daytoy, sinaludsud ni Sen. Francis “Kiko” Pangilinan no sadinno ti ayan ni Garin, ken insungbat met ni PROTECT Committee Chairman Sen. Sherwin Gatchalian a maipagarop a busy ti DOE chief isut gapuna a saan a nakaatendar iti panagdengngeg.
Nupay kasta, inpetteng ni Pangilinan a mabalin met nga intantan paylaeng ni Garin dagiti naka-schedule a taripnong na.
Inpalgak met ni Senador Legarda a no agkiddaw ti ahensya ti pondo, uray overnight ket kabaelan da ti agatendar ngem no crisis action plan ket ado ti rason da.
Mainaig iti daytoy, kalpasan ti sumagmamano a gundaway ket kimmamat metlaeng ni Garin a napan nagatendar iti panagdengngeg.
Kabayatanna, iti panagdengngeg, arigna saan a nagustwan ni Legarda ti palawag ni Department of Energy Undersecretary Alessandro Sales iti kiddaw ti ahensya para iti supplemental budget ti Philippine National Oil Company (PNOC), no sadinno a ti rason a saan pay a naipatungpal ket gapu ta maipagarop nga “on break” ti kangatoan a pagpandayan linteg iti Kongreso.
