LAOAG CITY – Inpublikar ni Oil Industry Management Bureau Dir. Rino Abad nga umabot iti 213 a pag-gasolinaan ti ininspeksionda manipud idi Nobiembre 10 gaingga 13, no sadinno 114 manipud kadagitoy ti naduktalan a saan a nangipatungpal ti umno a panagbaba ti presio.
Mainaig iti daytoy, inpakaamo ti grupo a pormaldan a nai-endorso ti inspection report iti Department of Energy (DOE) para iti naan-anay a pannakaaksionna.
Kaageddan daytoy, nagtataripnong met idi Biernes dagiti field offices ken legal services para iti pannakaitingiting kadagiti mabalin a maipila a reklamo kadagitoy.
Segun iti ahensia, dua ti makitkitada a mabalin nga maaramat iti kadagiti naipila a dokumento no umabot iti pormal a a pannakaipila ti kaso dagiti nasao a panaglabsing dagiti oil firms.
Umuna ket ti Oil Regulation Law, no sadinno a ti saan a panangsurot iti naikeddeng a presio ket sumango dagitoy iti pannusa manipud iti korte a 3 a bolan agingga makatawen a pannakaibalud ken multa a 50,000 agingga 300,00 a pisos.
Maika-dua ket ti Presidential Decree 1865, partikular iti Section 2(E) kontra kadagiti napangina a produkto ti petrolio.
Iti salinong ti nasao a Presidential Decree, ti mapaneknekan a naglabsing ket agmulta ti 10,000 a pisos, suspension wenno panangibabawi ti permit, criminal penalty a 20,000 agingga 50,000 a pisos ken ti dua agingga lima a tawen a panakaibalud.
Kas paet iti proseso, naikkan ti 72 nga oras dagiti nasao nga istasion tapno isubmitir ti palawagda babaen ti show cause order.
Mainaig iti daytoy, kaadoan kadagiti rasonda ket ti pananggatangda kadagiti stock-da iti nangato a presio idi napalabas a bolan sakbay pay ti panangi-anunsio ti departamento ti pannakaipatungpal ti panagbaba ti presio.












