LAOAG CITY – Positibo ti resulta ti naiyuswat a search warrant operation iti Barangay Maipalig iti ciudad ti Batac babaen iti nagtitipon a pwersa ti PDEA, INPPO, PDEU, PNP Batac ken PNP Paoay.
Nabigbig ti subject ti operasyon a ni Mr. Joseph Ocampo, agtawen ti 29, awanan ti asawa ken residente iti nadakamat a barangay.
Nakumpiskar dagiti otoridad ti lima a sachet ti maipagarop a shabu a naikabil iti kaha ti sigarilyo ken ti pito a sachet ket naikabil met iti pouch ken naiparabaw iti katre na iti uneg ti kwarto na.
Malaksid iti maipagarop a shabu, nakumpiskar pay dagiti otoridad ti lighter, foil ken dadduma pay.
Iti agdama ket nagtalinaed ni Ocampo iti kustudiyar ti PNP-Batac idinto a ti reklamo kontra kenkuana ket ipila ti PDEA.
Mainaig iti daytoy, inadmitir ni Barangay Chairwoman Aurelia Ulit iti Barangay Maipalig iti ciudad ti Batac nga addan dagiti immunan a report kadakuada mainaig iti maipagarop a panagus-usar ti subject ti operasyon a ni Mr. Joseph Ocampo, agtawen ti 29 ti illegal a droga.
Inbaga na a nakumpirmaran da laeng a pudno nga agus-usar idi boluntaryo a napan simmuko gapu iti progama ti PNP nga Oplan Tokhang.
Nupay kasta, kuna ti kapitana nga idi kangitingitan ti covid-19 pandemic ket saan unay a rimrimuar iti balayda ni Ocampo.
Inpakaammo na nga idi awan pay ti pandemya ket kanayun a rumuar ni Ocampo iti malem ken sumangpet laengen iti sumaruno nga aldaw gapu ta mapalpalabas da daytoy iti checkpoint.
Immunan nga inadmitir ti ama ti subject ti operasyon a ni Mr. Wilie Ocampo, agtawen ti 60, nga agus-usar ti illegal a droga ti anak na ngem saan nga aglaklako.
Kuna ti ama nga Ocampo a no aniaman ti nagbasulan ti anak na ket masapol a sangwen na ken mangkita da ti abogado a mangtulong kenkuana.
Kabayatanna, inbaga ni PDEU Agent Paul Pistelos a nabayagen a monmonitoren da ti ub-ubing nga Ocampo ken maysa daytoy kadagiti kaaktiboan a drug personality ditoy probinsya.
Saan met a makumpirmaran ni Pistelos no paggapgapuan dagiti ilaklako nga illegal a droga ni Joseph Ocampo.
Inpakaammo pay ni Pistelos nga umab-abot iti 30 ribo a pisos ti balor dagiti naala da a pito a sachet a naglaon ti maipagarop nga illegal a droga manipod iti suspek.
