LAOAG CITY – Naarestar dagiti otoridad dagiti uppat nga indibidual a konektado iti panagatake iti cockfighting ring a nakatayan ti 12 a tattao idiay Ecuador.
Basar iti report, nakakumpiskar dagiti otoridad ti naruay nga armas ken dagiti peke a police ken army uniforms kabayatan ti iraraot da iti north-western Manabí province, maysa nga aldaw kalpasan ti panagatake iti rural community ti La Valencia.
Immunan a nagwaras dagiti video a pakabuyaan ti iseserrek dagiti armado a lallaki a nagpammarang a pulis ken soldado iti cockfighting ring kalpasan na ket kellaat lattan a nagpalto-paltog da.
Naduktalan a dagiti suspek ket miembro ti criminal gangs ken dagiti kalaban da ket adda da iti lugar rason a napanda rimmaot.
Rumrumuar nga umabot iti 20 a criminal gangs ti agop-operar iti Latin American country.
