LAOAG CITY – Natay ti 12 nga indibidual gapu iti suicide bombing iti ruar ti korte ti kabisera ti Pakistan nga Islamabad.
Segun ken ni Mohsin Naqvi, Interior Minister idiay Pakistan, agarup 27 a tattao ti nasugatan gapu iti napasamak nga insidente a manarimaan pay laeng a matamtaming iti ospital.
Inbatadna a plano ti suspek nga umatake iti district courthouse ngem napaay a makastrek iti uneg ti korte.
Inlawlawagna nga ipangpangruna dagiti otoridad iti panangbigbig ti suspek ken dagiti karaman iti likudan ti insidente.
Kunana a manmano laeng ti suicide bombing iti pagilianda no sadinno a makita iti sumagmamano a ladawan ti nauram a lugan ken naikabil a police cordon iti lugar.
Mainaig iti daytoy, inpakaammo ni Naqvi a pinabettak ti suspek ti bomba iti asideg ti maysa a police car kalpasan a naguray daytoy iti uneg ti 15 a minuto.
Naiget met a kinondenar ni Pakistani President Asif Ali Zardari iti nasao nga insidente.
Kabayatanna, kuna ti maysa nga abugado a ni Rustam Malik a manarimaan ti panangi-parking-na ti luganna iti ruar ti korte idi kellaat nga adda ti nangngegna a napigsa a panagbettak.
Innayonna a dagiti padana nga abugado ken dadduma pay a tattao ti nagtataray iti uneg ti complex no sadinno a nakitana nga adda ti dua nga indibidual ti natay a nakadasay iti gate ken sumagmamano a lugan ti nauram.
