LAOAG CITY – Agarup 129 nga indibidual ditoy ciudad ti Laoag ti naipayaan ti tulong babaen ti programa nga Assistance to Individuals in Crisis Situation ken Emergency Shelter Assistance.
Inbatad ni Ms. Perlita Cabello, mangidadaulo ti City Social Welfare and Development Office a maitultuloy a maipaayan ti tulong dagiti umili a nakana a naapektaran ti bagyo iti kallabes kangrunaan na kadagiti nadadaelan ti sumagmamano a paset dagiti balayda kasta metten dagiti napukawan ti taraken.
Inpakaammo na a nakawat dagiti benepisiario iti ₱5,000 para kadagiti nagkiddaw iti Medical Aid, ₱8,000 iti Aid for the Dying, ken ₱3,000 iti Food Support ken ₱3,000 iti Housing Aid para kadagiti naapektaran.
Mainaig iti daytoy, inpalagipna kadagiti umili a mabalin da ti agkiddaw ti nayun a tulong iti babaen kadagiti dadduma pay a program ditoy ciudad.
Impatalged na a sidadaan a kanayon ti lokal a gobierno ditoy ciudad a mangipaay ti suporta kadakuada.
Innayona a maikarigatan a maipaayan dagiti umili kadagiti kasapulan da nangnangruna ti para iti pamilia da.
