LAOAG CITY – Kinumpirmaran ti Philippine Consulate General idiay Hong Kong nga adda ti 13 a Pilipino ti saan pay a nakita kalpasan ti pannakauram ti Wang Fuk Court Residential Complex.
Segun ti Philippine Consulate General iti Hongkong, dagiti 13 nga indibidual ket saan pay nga opisyal a maibilang kas mapukpukaw, ngem agpapan ita ket saan pay a makumpirmaran dagiti otoridad no sadinno ti ayanda iti agdama.
Iti kaudian a datos, umaboten iti 128 a tattao ti natay idinto a 83 dagiti nasugatan no sadinno a maysa ditoy ket Pilipino, ken 150 a sabsabali dagiti nagtalinaed a mapukpukaw kalpasan ti insidente.
Immuna iti daytoy, nangipatungpal ti tallo nga aldaw a panagladladingit iti Hongkong kalpasan ti maibilang a kagrabean nga uram iti uneg ti 80 a tawen iti nadakamat a lugar.
