LAOAG CITY – Naidiaya ti 1,400 a trabaho kadagiti job seekers kagiddan ti maika-127 nga anibersario ti Independence Day ditoy Pilipinas.
Adda ti 37 nga employers manipud kadagiti nagduduma nga opisina ken kompania ti nakipaset iti nasao nga aktibidad.
Segun ken ni Ilocos Norte 2nd District Representative Angelo Marcos Barba, nasken laeng a matulungan dagiti umili nga agbirbiruk ti pagtrabahoanna.
Inbatadna a babaen iti daytoy a wagas ket maiyasideg kadakuada dagiti trabaho a mabalinda nga aplikaran.
Mainaig iti daytoy, inpakaammo ni Department of Social Welfare and Development Regional Director Marie Angela Gopalan nga adda ti inpaayda a tulong pinansial ken serbisio kadagiti umili.
Kabayatanna, kuna met ni Dr. Paula Paz Sydiongco, Director IV ti Ilocos Center for Health Development a nangisayangkatda ti medical consultation kadagiti nakipaset iti nasao a job fair.
