LAOAG CITY – Inrakurak ni Interior and Local Government Sec. Eduardo Año nga addan ti 143 a barangay officials ti napilaan dan ti kaso mainaig iti maanomalya a pannakaibunong ti Social Amelioration Program (SAP).
Iti Laging Handa Public Briefing, inbatad ni Sec. Año nga addan iti piskalya dagiti kaso ken nagyaman ken ni Justice Sec. Menardo Guevarra iti panangiprayoridad na iti inpila da a kaso.
Segun ken ni Sec. Año, agpanpanawagan da iti publiko nga agsiim da a naimbag kangrunaan na iti maikadwa a bansada ti SAP ken dagus nga ireport iti complaint center ti DILG no makitaan da daytoy ti anomalya.
Kabayatanna, nagballaag manen ti opisyal kadagiti barangay officials a saan a kurakuten ti kwarta ti gobierno para iti nasao a programa ita a panawen ti COVID-19 pandemic.
