LAOAG CITY – Inpakaammo ni Ms. Antonette Bareng, mangidadaulo ti Business Permit and Licensing Office ditoy siudad ti Laoag a 149 laeng dagiti ambulant vendors a nakarehistro iti opisinada.
Inbatadna a saanna a maikari a maminpinsan a maikkat wenno tumalaw dagiti dadduma nga ambulant vendors kadagiti kalsada nga awanan ti business permit.
Inlawlawagna a naiget met ti panangmonitorda ken pammagbagada kadagiti maseknan nga aglaklako ngem agsublidanto latta kadagiti puestoda.
Kunana nga ikarkarigatanda ti amin tapno makabirok ti wagas a maikkat isuda kadagiti kalsada tapno saan pay a makaabbeng iti taray ti trapiko a dakkel a problema kadagiti motorista.
Innayonna a basar iti kapadasanda ket tumalaw met nga insigida dagiti bagbagaanda nga ambulant vendors ngem apaman a makatallikodda ket agsublidanto manen kadagiti puestoda.
