LAOAG CITY – Nagpalagip ti Business Process and Licensing Office kadagiti business owners ditoy siudad ti Laoag a gundawayan ti nabatbati nga aldaw ti Pebrero tapno agpa-renew kadagiti business permit-da.
Segun ken ni Atty. Charito Malicad, mangidadaulo iti nasao nga opisina, masapul nga iyalokaran dagiti maseknan ti oras para iti panag-renew dagitoy gapu ta agingga laengen inton Pebrero 28 daytoy.
Inbatadna a basar iti kaudian a datos iti opisinada idi Pebrero 15 ket adda ti 4,900 ti nakapa-renew kadagiti business permit-da.
Kunana a kadagupan daytoy ket adda pay ti sumurok-kumurang maysa a ribu nga ur-urayenda nga ag-renew agingga inton Pebrero 28.
Inlawlawagna a kalpasan ti nasao nga aldaw ket addanton ti maipataw a pannusa.
Innayonna nga awan ti problema ti naladaw a panagturongda iti opisinada ngem adda ti nayon a bayadanda dagitoy.
