LAOAG CITY – Umabot iti 15 a tattao ti natay idinto a nasurok a 195 a sabsabali dagiti mapukpukaw kalpasan a naarinebneb ti nagluganan da a bangka iti asideg ti ciudad ti Nouakchott idiay Mauritania.
Daytoy ti kinumpirmaran ti International Organization for Migration (IOM) .
Inbatad ti International Organization for Migration nga adda met ti naisalakan ti Mauritanian coastguard a 120 a tattao, pakairamanan ditoy dagiti ubbing kalpasan ti insidente.
Naamoan a dagiti biktima ket naggapo da idiay Gambia ken pito nga aldawen nga aglaylayag da idi naarinebneb ti nagluganan da a bangka.
Inpakaammo ti International Organization for Migration a basar ti datos da ket addan ti nasurok a 4,500 a migrants a pimmusay babaen iti pannagna da iti nasao a rota sipud idi 2014, karaman ditoyen ti 1,950 a pimmusay iti laeng napalabas a tawen.
