LAOAG CITY – Umabot iti 16 a pamilya ti naikkan ti koneksyon ti kuryente na iti Sitio Maharlika, Brgy. 1, San Lorenzo ditoy ciudad ti Laoag.
Segun kenni Ilocos Norte Electric Cooperative General Manager Perry Martinez, nakagastos da ti 330,000 tapno mapasilawan ti pagtaengan dagiti nasao a pamilya.
Kuna ni Martinez a daytoy ti maysa a model kadagiti kalikagom da nga aramiden ditoy probinsia.
Inlawlawagna a ti rural electrification ti kooperatiba ket obligado a mangikonektar ti kuryente no 10 agpangato ti bilang dagiti pagtaengan iti maysa a lugar nga awan koneksyon na.
Innayon na a dagiti nababbaba ngem ti nasao a bilang ket pagbayaden da.
Mainaig iti daytoy, inbatad ni Martinez a bayat ti panagsurvey da ket ado dagiti masapol a mapasilawan ditoy probinsia.
Nipay kasta, kunana a saan a kabaelan ti kooperatiba no isuda laeng ti mangipatungpal iti daytoy no di ket masapol da ti tulong ti gobierno probinsyal ken dagiti Local Government Unit.
Kabayatanna, inkari ni Mayor James Bryan Alcid ditoy ciudad ti Laoag a nakasagana a makitinnulong iti Ilocos Norte Electric Cooperative tapno maikkan ti koneksyon ti kuryente dagiti nabatbati pay a pagtaengan.
Naamoan nga iti napalabas a bulan ket nagkamang dagiti nasao a pamilya iti opisina na rason a nakikoordinar ti mayor iti Ilocos Norte Electric Cooperative tapno matulungan dagitoy.
Mainaig iti daytoy, kayat a maamoan ni Alcid ti eksakto a bilang dagiti awan pay ti koneksyon ti kuryente na tapnu maiyalokaran da ti pondo.
Kalikagom met ni Vice Governor Matthew Marcos Manotoc a maikkan ti pagsapulan dagiti 16 a pamilya malaksid iti pannakaipaay ti koneksyon ti kuryente da.
Kunana a saan a makaumanay a maikkan da ti balay ken kuryente no di ket masapol nga adda met ti pagsapulan da.
