LAOAG CITY – Inpakaammo ni Mayor Cresente Garcia iti ili ti Burgos a nakababan dagiti 16 a riders a na-stranded iti bantay a paset ti Barangay Agaga iti nadakamat nga ili.
Segun kenni Garcia, idi napan iti bantay dagiti maseknan ket saan dan a masurutan ti pagbabaan da gapo ta awan ti silaw da, uray dagiti motorsiklo da.
Gapo iti daytoy, nagtalinaed da iti tuktok ti bantay tapno adda ti signal ti cellphone ken nagpatulong da kenkuana.
Inlawlawag na nga idi katetext na dagiti riders ket binalakadan na dagitoy a saan a pumanpanaw iti ayan da tapno alisto a matuntun dagiti pulis ken dagiti opisyales ti barangay.
Kuna pay ti mayor a basar iti maysa nga indibidwal a napan nangbalon kadagiti maseknan ti danom nga adayo ti nakadanonan dagitoy ken nagnagna iti agarop maysa nga oras.
Ummuna iti daytoy, kuna ni Garcia a napan dagiti maseknan iti Kaangrian falls ken kalpasan daytoy ket kalikagom da kuma a serken ti nagbedngan ti Burgos ken Pasuquin ngem rumrumwar a sabali ti nasurot da a dalan.
Kabayatanna, nagyaman dagiti maseknan iti mayor ken dagiti amin a timmulong kadakuada tapno makababa da manipud iti bantay.
