LAOAG CITY – Inlawlawag ni 1st District Congressman Sandro Marcos no apay nga immakar daytoy manipud iti Partidong Federal ng Pilipinas a napan iti Lakas–Christian Muslim Democrats.
Segun kenkuana, nakita ni Speaker Bojie Dy III, nga awan ti mangidadaulo iti Lakas–Christian Muslim Democrats ken patienna a ti datina a Partido a Partidong Federal ng Pilipinas ket adda iti nasayaat nga ima gapu ta adda ditoy ti presidente, speaker, senior deputy speaker ken agarup amin a house leader ket adda iti datina a partido.
Innayonna nga imbilin ni Speaker Dy kenkuana a mapan pay laeng ti nasao a diputado tapno adda ti maasitganda a house leader no adda dagiti agtaud a problemada.
Kinunana nga idi naglabas ket awan ti matarayanda a mangidadaulo iti nasao a partido nga adda ti leadership positionna tapnu matulungan dagiti distritoda.
