LAOAG CITY – Saan a mamati ni Mamamayang Liberal (ML) Party-list Rep. Leila de Lima iti rakurak ni Ombudsman Jesus Crispin “Boying” Remulla a malpas ti Independent Commission for Infrastructure (ICI) ti imbestigasionda iti uneg ti maysa agingga iti dua a bulan.
Para ken ni De Lima, imposible daytoy a malpas gapu iti kinaadu ken kinalawa ti trabaho ti Independent Commission for Infrastructure.
Nagyaman ni De Lima iti Independent Commission for Infrastructure iti trabahoda kas ti dinakamat ni Remulla a dakkel a katinnulungan isuda uray limitado ti bileg ken resources-da.
Inlawlawagna a mabalin latta nga umawat ti nayon nga ebidensia ti Independent Commission for Infrastructure uray nai-refer-dan dagiti sumagmamano a kaso iti Ombudsman nangruna no adda ti karaman a dadakkel a personalidad iti maanomalya iti flood control projects.
Kunana a nalawlawa ti mandato ti Independent Commission for Infrastructure ngem iti panpanunoten ti kaaduan no sadinno nga adu pay ti mabalinda a tingitingen a posible a panaglabsing kadagiti linteg a nakailanad iti Executive Order No. 94.
Maipalagip a nangrugi ti Independent Commission for Infrastructure iti panagdengngeg kadagiti kaso ti maanomalya a flood control projects idi katengngaan ti Setiembre.
