LAOAG CITY – Inpasigurado ti Independent Commission for Infrastructure (ICI) nga agtultuloy laeng ti ar-aramiden a panagtrabaho ken imbestigasion kadagiti maanomalya a flood control projects kabayatan a saan pay daytoy a naikkat.
Inbatad ni Independent Commission for Infrastructure Chairman ken Ret. Justice Andres Reyes, iti agdama ket agtultuloy ti panang-review ti komision dagiti kaso kabayatan nga iyur-uray ti desision ti Malacañang kalpasan ti panangtingiting iti 125-day report nga insubmitirda.
Iti baet a saan pay a nalawag no inton ano a mangiparuk-at ti pinal a desision ti Palasyo mainaig iti agbalin a sumaruno nga addang para iti komision ket saan nga agsardeng ti komision iti panangimbestigar iti substandard, ghost ken double funding wenno overpriced a proyekto nga inpatungpal ti Department of Public Works and Highways (DPWH).
Nupay kasta, inadmitir ni Reyes a saan daytoy a makatignay kas Chairman ti Independent Commission for Infrastructure gapu ta isuna laengen ti nabatbati a miembro daytoy.
Iti agdama, saan pay a masinunuo no inton ano a maikkat ti Independent Commission for Infrastructure ken saanen a nangipaay ni Reyes ti rakurak no kinasaritanan ti Office of the President mainaig iti estado ti komision.
