LAOAG CITY – Balligi ti dua nga aldaw a pannakaisayangkat ti 17th National Food Showdown 2026 ditoy probinsia

Daytoy ket inatendaran dagiti chefs ken culinary participants manipod kadagiti nagduduma a rehion ken institusyon iti pagilian iti Centennial Arena ditoy siudad ti Laoag.

Pakairamanan ditoy dagiti agarop 300 nga estudiante nga aggapo iti Region 1, 2, ken Cordillera Administrative Region (CAR) a nakipaset iti nasao nga aktibidad.

Mainaig iti daytoy, babaen ti tema a “Kulinarya Rehiyones: Lasap Pilipino,” intampok dagiti nakipaset ti skills, creativity, ken bukod da a regional flavors babaen kadagiti nadumaduma a culinary competitions kas ti panagluto kadagiti tradisional ken moderno a putahe, panagaramid iti desserts ken kakanin, wedding cake display, coffee concoction, bartending, table setting, ken dadduma pay a paset ti culinary arts.

Ti aktibidad ket linukatan ni Ilocos Norte Governor Cecilia Araneta-Marcos, impanagetgetna ti kinapateg ti panangsalimetmet kadagiti tradisional a putahe ken lokal a kultura ti taraon, kasta met ti panangipaay ti gundaway kadagiti mannalon, food businesses, ken culinary practitioners a mangipakita kadagiti produkto ken talento da.

Kabayatanna, inbatad ni Mr. Aian Raquel, mngidadaulo ti Provincial Tourism Office of Ilocos Norte, a makatulong ti aktibidad iti panangitandudo ti turismo babaen iti panangitampok kadagiti lokal a putahe.

Innayonna a mangipaay pay daytoy ti gundaway kadagiti farmers ken lokal a producers a mangipakita kadagiti produktoda.