Manamnama ti panangaramat ti lokal a gobierno iti ili ti Nueva Era ti ekstension ti Plaza ken ti parke da para iti pannakaisayangkat ti Christ the King, maysa a prosision a maisayangkat intono Nobiembre 22.
Segun ken ni Mayor Aldrin Garvida, ti plaza ken parke ti manamnama a pagyanan dagiti bisita a makipaset iti nasao nga aktibidad.
Mainaig iti daytoy, kuna ti mayor a manamnama nga umabot iti 5 agingga 7 a ribo nga indibidual ti makipaset iti Christ the King iti nadakamat nga aldaw.
Kabayatanna, inbatad ni Mayor Garvida a tumultulong met dagiti barangay ken nagduduma a volunteers iti panagsagsagana ti lokal a gobierno tapno masigurado ti natalged ken naurnos a pannakaiwayat ti nasao a programa.
Inpanamnama ti mayor ti naiget a koordinasion ti lokal a gobierno ti nasao nga ili ken dagiti kameng ti nailian a kapulisan, no sadinno a 300 a pulis ti mai-deploy manipud iti probinsia tapno mapagtalinaed ken masigurado ti natalged ken naurnos a programa.
Iti met biang iti trapiko, kuna ni Garvida nga adda ti naikeddeng a pagparkingan dagiti lugan, no sadinno nga agaramat da ti color coded stickers para iti naur-urnos a pagyanan dagiti behikulo dagiti makipartisipar iti prosision.










