Nakumpiskar ti Bureau of Customs–Ninoy Aquino International Airport (BOC-NAIA) ti 15.036 kilo ti maipagarop nga ilegal a droga nga agbalor ti P89.16 milyon manipod iti 12 a naabandonar a parcel iti maysa a warehouse iti Pasay City idi Nobyembre 6, 2026.
Naamoan a nggapo iti Thailand, India, United States ken Netherlands dagiti parcel.
Karaman kadagiti nakumpiskar ti 11.241 kilo ti maipagarop a shabu, 1.563 kilo ti marijuana kush ken 2.232 kilo ti ketamine.
Nailemmeng dagitoy kadagiti bado, makan ken dadduma pay a gamit.
Indaulwan ti BOC-NAIA ti operasyon kadwa da ti Philippine Drug Enforcement Agency (PDEA) ken dadduma pay nga ahensya.
Inpetteng ni Customs Commissioner Ariel F. Nepomuceno ti kinapateg ti naiget a panangtingiting iti amin a maipawpawit, karaman dagiti naabandonar a parcel tapno malapdan ti pannakaipuslit ti illegal a droga.
Insumitiren ti PDEA Laboratory Service dagiti nakumpiskar para iti pannakatingiting ken kumpirmasyon.
Agtultuloy met ti imbestigasyon tapno maduktalan dagiti karaman iti daytoy ken maipila ti maiyannatop a kaso.
