LAOAG CITY – Nakumpiskar ti Bureau of Customs–Ninoy Aquino International Airport (BOC-NAIA) ti 15.036 a kilo ti mapapati nga iligal a droga nga aggatad ti P89.16 million manipud iti 12 a parcel iti maysa a warehouse iti Pasay City idi Oktubre 6, 2026.
Dagiti nasao a parcel ket naggapu idiay Thailand, India, United States ken Netherlands.
Karaman kadagiti nakumpiskar ti 11.241 a kilo ti mapapati a shabu, 1.563 a kilo ti marijua kush ken ti 2.232 a kilo ti ketamine.
Ti nasao nga operasion ket indauloan ti Bureau of Customs–Ninoy Aquino International Airport (BOC-NAIA), Philippine Drug Enforcement Agency (PDEA) ke dagiti dadduma pay nga ahensia.
Inpetteng ni Customs Commissioner Ariel F. Nepomuceno ti importansia ti naiget a panangkita iti amin a paw-it, pakairamanan dagiti parcel, tapno maliklikan ti pannakaipuslit ti iligal a droga.
Kabayatanna, insubmitiren ti PDEA Laboratory Service dagiti nakumpiskar a droga para iti kumpirmasion, kabayatan ti panagtultuloy ti imbestigasion tapno maamoan dagiti posible nga adda iti likudan dagiti nakumpiskar nga iligal a droga.
