LAOAG CITY – Maisagsaganan dagiti dokumento para iti pannakaipila ti kaso kontra iti subject ti naiyuswat a drug buy-bust operation iti ili ti Pasuquin.
Daytoy ti inbatad ni Police Major Sheryll Guzman, ti chief of police iti ili ti Pasuquin.
Ti suspek ket maysa a lalaki, agtawen 51, mannalon, naasawaan, ken residente iti Brgy Naglicuan iti ili ti Pasuquin.
Kuna na a sumango ti suspek ti kaso mainaig iti panaglabsing ti Republic Act 9165 wenno Comprehensive Dangerous Drugs Act of 2002.
Segun ken ni Guzman, ti suspek ket maibilang kas newly identified nga Street Level Individual.
Kabayatanna, inpakaammo ni Guzman a positibo pay iti resulta ti drug test ti nasao a suspek.
Maipalagip nga iti pannakaarestar ti suspek ket nakakumpiskar dagiti otoridad ti maipagarop a shabu nga agdagsen iti 6.7 a gramo ken mapatta-patta nga agbalor ti P45,560 ken ti personal a kuarta na a P3, 940.
Iti agdama, nagtalinaed iti Philippine National Police iti ili ti Pasuquin ti suspek.
