LAOAG CITY – Bimmaba iti pwesto ni Spain Transport Minister Óscar Puente, innem nga aldaw kalpasan ti panagdinnungpar ti dua a tren iti ili ti Urda a nakatayan ti 69 a tattao ken naruay a sabsabali pay dagiti nasugatan.
Inrakurak ni Puente ti desisyon na iti sangwanan ti Kongreso kalpasan nga inpetteng na a saanen a rumbeng nga agtalinaed iti pwesto kalpasan ti nakaro nga aksidente iti riles iti uneg laeng ti maysa a tawen.
Napasamak ti trahedya idi Oktubre 28 idi dinungpar manipod iti likud ti maysa a tren ti Renfe ti nakasardeng a tren gapu ta adda ti problema iti automatic signalling system ken dagiti maipagarop a kamali iti komunikasyon iti control centre.
Malaksid iti panagbaba ni Puento kas ministro, inikkat pay ni Puente ti nagan na iti listaan dagiti kandidato para iti naikeddeng a nasapa nga eleksyon intono Nobyembre 29 iti baet ti panawagan ti oposisyon a maaddaan daytoy ti pagsungsungbatan.
Dinayaw met ni Prime Minister Pedro Sánchez ti desisyon ti opisyal ken kunana a ti panagbaba iti pwesto ni Puento ket maibasar iti budokna a desisyon, for delicadeza, ken respeto kadagiti biktima.
Ti nasao nga aksidente ket maibilang a maysa kadagiti kagrabean a trahedya iti riles iti pakasaritaan ti Europa a nangitunda ti dakkel a krisis iti panagtalek ti publiko iti seguridad ti high-speed rail system iti Espanya.
