LAOAG CITY – Umaboten iti 2,777 a kaso ti dengue ti nairekord ditoy probinsia manipud Morbidity Week 1 agingga Week 42.
Daytoy ket basar iti kaudian a datos ti Provincial Epidemiology and Surveillance Unit (PESU).
Basar iti datos, manipod iti nasao a bilang ti kaso ket addan ti uppat a pimmusay.
Gapu iti daytoy, naibalakad ti agtultuloy a panangipatungpal kadagiti usto a wagas tapno malapdan ti ad-adda pay a panagadu dagiti kaso ditoy probinsya.
Karaman ditoy ti panangikkat dagiti pagyanan ti danum a pagitlogan dagiti lamok, taktaken ken dalusan dagiti banag a mabalin a pagurnongan ti danum, siguraduen a namaga ken nadalos ti aglawlaw tapno saan a pagyanan dagiti lamok ken no adda adda sintomas ti dengue kas iti agnanayon a gurigor, nakaro a sakit ti ulo, wenno panagbakwar, mapan a dagus iti kaasitgan nga health facility.
Nagpalagip ti Provincial Epidemiology and Surveillance Unit a ti pannakasalaknib kontra dengue ket responsibilidad ti tunggal maysa.
