Inbatad ni Vice Mayor Remigio Medrano nga adda ti inaramid ti lokal a gobierno a contingency plan para iti pannakaibelleng a nasayaat dagiti medical waste manipod iti Primary Health Care ti nasao nga ili.
Kuna na a naipalaon iti contingency plan ti panagaramid da ti chamber ti Sanitary Landfill tapno isu ti pakaikabilan da dagiti maurnong a medical waste.
Inlawlawag na a saan nga inaldaw a mabunag dagiti medical waste no di ket kasapulan a maurnong ken ti laeng ahensya nga accredited iti Department of Health ti rumbeng a mangbunag kadagitoy.
Mainaig iti daytoy, inrakurak ni Medrano nga awan ti plano ti lokal a gobierno a makibinnulig iti Governor Roque Ablan Senior Memorial Hospital ditoy ciudad ti Laoag mainaig iti pannakaibelleng dagiti nasao a medical waste gapu ta addan ti naala da a service provider.
