LAOAG CITY – Personal a nagturong ni Mrs. Jessica Ramos, biktima iti panangbastos ti maysa a driver iti naglugananna a tricycle, iti opisina ti Women and Children Protection Desk iti Laoag City Police Station ita nga aldaw, Oktubre 22.
Ditoy, nakasangona ti nabigbig a tricycle driver a ni Mr. Inisencio Domingo.
Naamoan a paayaban dagitoy ti barangay ken ditoy a mapilaan ti kaso a panaglabsing ti Republic Act 11313 wenno iti Safe Spaces Act (Anti Bastos Law) ti tricycle driver.
Kabayatanna, saan pay a maipasigurado ti biktima ti pannakaipila ti kaso gapu ta maasyan daytoy iti driver ngem naamoan a kalikagumna nga ipasuspenso ti panagpasada ken ma-revoke ti lisensia iti driver.
Iti agdama, iyururay ti kameng da Ms. Ramos no mano a bulan ti suspension ti mabalin nga ipataw ti traffic division iti siudad ti Laoag iti driver ti tricycle.
Nupay kasta, personal a nagturong ti Bombo Radyo Laoag ti pagtaengan ti nadakamat a tricycle driver tapno alaan iti statement-na mainaig iti daytoy a pasamak ngem nagkedked daytoy a nakisarita.
Maipalagip a nag-viral ti maysa a video post ni Ramos mainaig iti panagbastos ti tricycle driver ken ni Ramos no sadinno inallukoy ti tricycle driver a makipagnaig daytoy iti biktima iti gatad a P2000.
