Manamnama a trateren iti plenario ti Kamara ti dua a napapateg nga insingasing a linteg manipud kadagiti Akbayan Representatives para iti ad-adda a natalged ken nainkalintegan a komunidad.
Gagem ti Safe Spaces Act Amendments wenno House Bill 768 a papigsaen ti proteksion kontra iti panagabuso iti babaen ti nadagsen a dusa iti “grooming” wenno pananggundaway iti talek dagiti ubbing.
Karaman pay iti House Bill 768 ti naiget nga addang tapno kontraen ti online sexual harassment kangrunaan ti makadadael a panagusar ti Artificial-Intelligence (AI) ken deepfakes kontra kadagiti indibidual.
Malaksid iti daytoy, agsungbat pay iti naisingasing a linteg dagiti institusion iti babaen ti naiget nga screening kadagiti empleado ti pagadalan ken panangdusa kadagiti saan a mangikankano kadagiti reklamo.
Nupay kasta, nakapukos pay ti SOGIESC Equality Bill wenno House Bill 765 iti panangipawil ti diskriminasion basar iti sexual orientation, gender identity, gender expression, ken sex characteristics iti trabaho ken pagadalan.
Impasigurado pay ti insingasing a linteg ti patas nga akses iti healthcare ken dagiti serbisio publiko para ti amin, tapno magun-od ti kalikagum nga hustisia ken proteksion.
