LAOAG CITY – Binalakadan ni Fire Senior Inspector Edison Reyes, ti acting City Fire Marshal ti Bureau of Fire Protection (BFP) Laoag City kadagiti umili ken dagiti nagduduma a pasdek negosio ti panangberipikarda kadagiti maka-transact-da a mangdakdakamat iti naganna wenno ti istasionda.
Daytoy ket kalpasan nga adda nanggandat a mangloko kadagiti nagduduma nga LPG retailers babaen ti panagpammarangna kas Fire Senior Inspector Reyes, no sadinno nag-order ti nasao a fake buyer ti 9 a tangke ti LPG, nagkiddaw ti load ken softdrinks a maipadeliver koma iti mismo nga istasion ti BFP Laoag.
Naamoan ni Reyes daytoy a panangloko ti maysa nga indibidual kadagiti aglako ti LPG kalpasan nga isuna mismon ti nakangngeg ti daytoy nga aramid ti nasao nga indibidual nga nangdakamat iti naganna babaen iti maysa tawag.
Gapu iti insigida a nag-post ti BFP Laoag ti pakdaar iti social media page-da, no sadinno awan pay ti 20 minutos a napalabas kalpasan ti panangipublikarda iti nasao a pakdaar, adda manen ti sabali nga LPG retailer ti immasideg kadakuada mainaig iti kapada met laeng nga order ti fake buyer.
Kabayatanna, binalakadan ni Fire Senior Inspector Reyes dagiti pasdek negosio ken dagiti indibidual ti saanda a panangsugbat ti tawag manipud iti numero a 09277425924 numero ti nasao fake buyer.
