LAOAG CITY –
Inbatad ni Ms. Shey Pia Abaya, mangidadaulo iti Public Employment Service Office ditoy suidad ti Laoag a maysa kadagiti pagsaayatan nga adda iti K-12 ket mabalin a makapag trabaho dagiti ubbing uray man pay daytoy laeng ti tinurposda.
Segun kenkuana ado dagiti kompanya nga agal-ala iti K-12 graduate wenno dagiti agdama pay laeng nga agbasbasa a Senior wenno Junior High.
Kunana a daytoy ti maysa a gagemna ti nasao a kurikulum gaputa babaen kadaytoy ket maisagana dagiti ubbing a sumrek kadagiti nagduduma a trabaho.
Mainaig iti daytoy kunana nga addan dagiti nagturpos iti K-12 a saanna a kabaelan iti agtuloy nga agbasa pay iti kolehiyo ngem saanna daytoy a kayat a saoen a saan dagitoy a makasapol iti trabaho kadagiti kumpanya gaputa adda met latta dagiti agal-ala kadagiti nagturpos iti Senior High.
Nupay kasta, kunana a kaadoan kadagiti kumpanya ita ket full-time iti alalaenda ngem depende iti trabaho a kalikagumda a serken.
Kabayatanna, gunitigot ni Abaya dagiti umili ti panagturongda iti opisinada tapno agisubmitir ti resume gaputa ado dagiti kumpanya nga agsapsapol iti manpower-da.
