LAOAG CITY – Natay ti uppat nga indibidual kalpasan ti panagbettak ti maysa a pagaramidan ti paputok iti ili ti Malasiqui, Pangasinan.
Kinumpirmaran ni Malasiqui Vice Mayor Daria Dolores Mamaril, ti nasao a pannakatay dagiti biktima a napasamak iti oras ti alas-7:30 ti rabii idi kalman, Mierkoles, Nobiembre 4.
Karaman kadagiti natay ti agtawen ti 7 nga ubing ken ti maysa a mapukpukaw.
Nairaman pay iti nasao a panagbettak ti maysa a lugan a nakaparada iti asideg ti lugar a nakapasamakan ti insidente.
Basar iti inisial nga imbestigasion, nakangngeg ti napigsa a panagbettak dagiti residente ti kabangibang a barangay a Tabo Sili ken Calbueg sakbay ti panagwaras ti uram.
Mabirokan ti nasao nga iligal a pagaramidan ti paputok iti boundary ti nasao a barangay.
Naamoan nga nausar a pagaraidan ti paputok ti maysa a dati a piggery a nirentaan dagiti biktima.
Kabayatanna, agtultuloy ti pannakaisayangkat ti imbestigasion dagiti otoridad mainaig iti napasamak nga insidente.
