LAOAG CITY – Nairekord ti nakapsot a panagbettak ti Bulkan Kanlaon iti Negros Island Region itay bigat.
Basar iti Philippine Institute of Volcanology and Seismology PHILVOCS, nairekord ti panagruar ti abo ken asok manipud iti bulkan sakbay a nagleppas ti panagbettak iti oras ti 7:36 itay bigat.
Ti bulkang Kanlaon ket maysa kadagiti aktibo a bulkan iti pagilian a masarakan iti suli a nagbaetan ti Negros Occidental ken Negros Oriental.
Maipalagip nga idi napalabas a tawen ket sumagmamano a panagbettak ti nairekord iti nadakamat a bulkan karaman dagitoy dagiti phreatic eruption a nangitunda ti panagruar ti abo a nagbalin a risgo iti salun-at dagiti residente.
Iti agdama, wanwanawanan dagiti otoridad ti nadakamat a bulkan tapno masigurado ti kinatalged dagiti residente.
Mainaig iti daytoy, binallaagan met ti lokal a gobierno ken ti Philippine Institute of Volcanology and Seismology PHILVOCS ti publiko nga agtalinaed nga alerto mainaig iti posible nga epekto ti nadakamat a panagbettak.
