Umabot iti 8,721 a pasyente ti inasikaso ti Philippine Red Cross (PRC) manipod idi Oktubre 29 agingga idi kalman, Nobyembre 2, kagiddan ti panangobserbar ti Undas 2026.
Segun iti Philippine Red Cross, amin nga inasikaso da a pasyente ket dimmalan ti vital signs monitoring.
Iti pakabuklan a bilang, 359 ti nairekord a minor cases idinto a 19 ti maibilang a major cases.
Karaman kadagiti minor case ti pannakaulaw, panagsakit ti ulo, panagpasar ti sugat ken gasgas, nakagat ti insekto, sprain, hypertension, gurigor ken dadduma pay.
Kabayatanna, karaman met iti major cases ti chest pain, seizure, suspected stroke, cardiac arrest, heat stroke ken marigatan nga umanges.
Siyam a pasyente ti naitaray iti ospital gapu kadagiti kondisyon kas ti stroke, panagkapsot ti bagi, napukawan ti poot ken hypoglycemia.
Para iti Undas operations, nangiwaras ti Philippine Red Cross ti 1,977 a personnel da iti intero a pagilian, karaman ti 132 staff ken 1,845 volunteers.
